Inengi labeZimbabwe abahlala eSouth Africa abalubhekise ekhaya ngempelaviki ukuyajabulela iKhisimusi bendawonye lezihlobo labangane bakhala ngokuthatha isikhathi eside belokhu bezama ukuphuma emngceleni weBeitbridge.
UMnu Wilson Moyo, olubhekise kibo eNkayi eMakhwathini uthi lokhu kungaqhubeka abanye bazayidlela emngceleni ikhisimusi.
“Isimo ma ngingaphawula ngaso esenzakala eborder sibuhlungu kakhulu asijabulisi neze. Uyathola ukuthi imoto ziningi. Ngingathi 1 and a half days siseborder mpela imoto zingadluli,” kutsho uMoyo.
“Ingadlula izopaka iye ngale, iyethule yonke imithwalo kuze kuyefika phansi, ma ungenamali yokuthi mhlawumbe udlulise, cha uzosokola ngempela hayi kunzima eborder kunzima.”
Kodwa umphathintambo wogatsha lwendaba zasekhaya kweleSouth Africa uMnu Siyabonga Cwele uthi uhulumende wenze konke akwenelisayo ukuze izihambi zingabanjezelwa kulo umngcele.
“Sengezelele izisebenzi zomngcele la ngoba bezisilela. Sengezelele ngesilinganiso esiphose sifike ingxenye ekhulwini (50%),” kutsho uCwele.
“Size sasusa abanye ehofisini yethu enkulu ukuze sivule amahofisi amanengi okudlulisa izihambi ukuze konke impahla labantu kudlule ngokuphangisa.”
Minyaka yonke umngcele weBeitbridge yiwo olabantu abanengi abaphuma kweleSouth Africa ngekhefu lekhisimusi inengi labo kuyizizalwane zeZimbabwe ezisebenza kulelo lizwe.
Nyakenye abanye bacine bedlalela ikhisimusi endleleni ngenxa yobunengi babantu abebephuma besiya eZimbabwe.
