Umayor wedolobho lakoBulawayo ukhansila Solomon Mguni uthi umanisipala wakhe wenze yonke imizamo yokudingela asebeluphele, abantwana, labagogekileyo ukudla, izembatho, lokunye abakuswelayo phansi kohlelo lwe Mayor’s Christmas Cheer Fund.
Ukhansila Mguni, ongowebandla leMDC, uxoxa loSithandekile Mhlanga weStudio 7 ngaloludaba, kanye lengxaki ezibhekane lomanisipala wakoBulawayo, ngesikhathi umnotho welizwe uqhubeka usiwa.
"IMayor's Christmas Cheer Fund iyimali kanye lempahla eyokuncedisa uzulu wako Bulawayo. Besesinelise ukufika ku $20 000. Sibe lamankampani amanengi abangasiqhubezanga impahla, abaqhubele bona bodwa basimema ukuthi sibe yithi esibaqhubelayo," kutsho uMguni.
Uthi amnkampani afana le Holiday Inn ephe abadala ukudla kwemini abavela eNtembeni labantwana abavela Ethunzini Wethemba badla ukudla okubiza imali ezinkulungwane zamadola ezilitshumi lambili, i$12 000.
UMguni uthi babelomkhosi omkhulu esigabeni seBulawayo South lapho abaqhubele abantu be Sidojiwe Flats, le Tshabalala Sizinda impahla engafika amadola azinkulungwane ezilitshumi lanhlanu, i$15 000 okungama hamaper okudla.
"So sesiyahlala njengamalunga ebodard ukuthi sikhangele esikutholileyo le list esiyitholileyo kumja ward officers ukuthi siboneukuthi ngobani okumele ba benefite," kutsho uMguni.
Uthi uhlelo lwe Cheer Fund bafuna ukuyiguqula ukuze iqhubeke umnyaka uze uyephela. Bafuna njalo ukudinga abantwana abadubekayo ukuthi babancedise ukufunda ezikolo zaphansi.
