Inengi lithi kuyathokozisa ukuthi uhulumende uselungiselela umthetho wokuthi abantwana befunde ezikolo bengabhadali imali yama school-fees, ngoba ibivele ingumthwalo kubazali abanengi.
Kodwa abanye bathi besabela ukuthi inyathelo leli lingabangela ukuthi imfundo elizweni ibe kuzinga eliphansi kakhulu, njengoba uhulumende evele engelamali yokuqhuba inhlelo zezikolo.
Umphathintambo kahulumende obona ngezemfundo uMnu. Paul Mavima, uthi ngemva kwalokhu, abantwana abayikubhadala njalo imali ye levy.
Ukuhlaziya loudaba, uSithandekile Mhlanga weStudio 7 uxoxe lengcwethi kwezemfundo uMnu. Isaac Mpofu.
Silokhu sikudaba lunye, sixoxe loNkosazana Magodonga Mahlangu, isiphathamandla senhlanganiso elwela amalungelo abesifazana labantwana i-WOZA, ebikhankasela ukuthi kubelemfundo yamahala elizweni.
UNkosazana Mahlangu uthi kusobala ukuthi uhulumende kalungiselelanga kuhle lelinyathelo ngoba imali ezadingakala ezikolo ibingahlelwanga kubudget yomnyaka ozayo.
Siqale ngokumbuza ukuthi umkhankaso wabo ubelomthelela na kunyathelo eselithathwa nguhulumende.