Odokotela abangamalunga enhlanganiso yeZimbabwe Hospital Doctors Association bayemba phansi besithi kababuyeli emsebenzini ngoba uhulumende elokhu engakalungisisi izikhalazo zabo.
Odokotela laba bakhalale umsebenzi ekuqaleni kwenyanga bekhala ngokuthi ezibhedlela akula mithi njalo besithi bafuna ukubhadalwa ngedola leMelika.
Uhulumende uphendule ngokumemezela ukuthi usebaxotshile umsebenzi ngeviki edluleyo.
Izolo uhulumende uhlangane labameli benye njalo inhlanganiso emela odokotela, iZimbabwe Medical Association, wabaxwayisa ukuthi nxa besawufuna umsebenzi kumele baphange babuyele ezibhedlela.
Kodwa abeZimbabwe Hospital Doctors Association bathi bona kabayingeni leyo ngoba kungela ngitsho lokukodwa abakhala ngakho osokulungisiswe nguhulumende.
Unobhala jikelele walinhlanganiso uMnu Mthabisi Bhebhe utshele iStudio 7 ukuthi bakhangelele ukuhlangana njalo lohulumende namuhla.
