Nansi isivivinyo: Ngubani onsundu owaba ligqwetha lakuqala eZimbabwe isaziwa ngokuthi yiRhodesia?
Imbali eyaziwa ngabanengi elotshwe phansi ithi ngowayengumgcinisihlalo webandla leZanu, uMnu Hebert Chitepo, yena owabhonjwa wafela emoteni ngomnyaka ka1975 ekweleZambia.
Kodwa usikhwicamfundo Jonathan Moyo uthi cha, akunjalo! Iqiniso yikuthi nguNguboyenja, indodana yeNkosi yamaNdebele uLobengula.
UMoyo uveze lokhu enkundleni yeTwitter lapho aphehle khona ingxoxompikiswano ephendulana labantu abanengi.
Aabanye bevumelana laye kodwa bebekhona abalokuthandabuza abafana loMnu Innocent Babhatsi Ncube, yena oqhuba izifundo zakhe zaphezulu kweleBhilithani.
Njengobubafazi, uNcube uveze ugwalo olwalotshwa ngumlobi omhlophe uMnu Terance Ranger olulesihloko esithi ‘African Voices in Southern Rhodesia.’
Kulolugwalo uMnu Ranger uthi uNguboyenja wayeloyisa ukuba ligqwetha khepha akasazange wakufeza lokhu.
Kodwa uMoyo uthi umntanenkosi waligcwalisa iphupho lakhe lanxa nje wasuka wavinjwa ukumela abasolwa nguhulumende wabamhlophe.
Le yinto efakazwe njalo yingcwethi kwezembali yeZimbabwe uMnu Phathisa Nyathi kungxoxo ayenze leStudio 7.
Ukuhlaziya loludaba sixhume enye njalo ingcwethi uMnu Mqondobanzi Magonya yena othi manengi amagoba amele aqondiswe ngembali yesizwe sikaMthwakazi.
