Amasotsha lamapholisa aqhubeke etshaya abantu mahlayana izolo lanxa eke achothozwa nguMongameli Emmerson Mnangagwa ekuphendukeni kwakhe ngoMvulo evela ezwekazi leEurope.
Olwela amalungelo oluntu njalo esebenza lenhlanganiso yeHuman Rights Watch uMnu Dewa Mavhinga uthi amasotsha avuke ubhova ntambama abhaxabula abantu kabuhlungu elokitshini leEastlea, eHarare.
KoBulawayo khona amasotsha abikwa etshaye abantu emalokitshini afana leMabuthweni.
Abasakhulayo abanengi babotshiwe njalo kulelidolobho izolo izitokisi zagcwala abanye bacina behanjiswa ejele leKhami.
Isimanga yikuthi uMnangagwa uthe efika elizweni wachathoza amapholisa lamasotsha esithi ubudlova abenzayo abuhambelani leZimbabwe entsha athi uzama ukuyakha.
UChris Gande weStudio 7 uxoxe lomeli weSoutherton edale lephalamende uMnu. Peter Moyo, owebandla leMDC, osinde ekuthunjweni emuzini wakhe.
