Ubudlwangudlwangu obenzakala ekhaya benzakala ngesikhathi amehlo amazwe amakhulu afana lele Bhilitane leMelika elenkinga zawo.
KweleMelika onozindaba babheke ngeso lokhozi udaba lokuvalwa kwengatsha zikahulumende kulandela ukungavumelani kwamabandla kuluhlu lwendleko zikahulumende uMongameli Donald Trump athi kumele kube lemali yokwakha umduli wokuvitsha umngcele lelizwe leMexico okwenza udaba lwe Zimbabwe lungaqakatheki kibo.
Kuthi kwele Bhilitane udaba lokuxexebuka kumanyano we European Union phansi kohlelo lwe Brexit yiyo indaba esegudwini. Okutshiye amazwe afana le South Africa umongameli walelo lizwe, uMnu. Cyril Ramaphosa athi umumo usunganeno okokuthi lezijeziso zenotho ezafakelwa ilizwe sokumele zisuswe.
Lokhu sokubangele ukuthi izizalwane zeZimbabwe ezihlala emazweni aphetsheya zizidingela indlela yokukhankasa ngokwenzakala ekhaya. Ngeviki edleleyo kube lokutshengisela ezigodlweni zabammeli beZimbabwe emazweni atshiyeneyo.
Sikhuluma nje izizalwane zeZimbabwe ezihlala ngapha kweleMelika ziqoqa ukutshengisela esigodlweni sommeli weZimbabwe eWashington DC. UChris Gande weStudio Seven uxoxe loMnu. Den Moyo omunye wabaqoqa loku kutshengisela.
