Iqembu lomdlalo wenguqu ele Highlanders selitshayelwe ihlombe ngemizamo yalo eyokuphungula isikwelede ebesilithwalise nzima eminyakeni eyedluleyo.
Lokhu kuvele emhlanganweni waleliqembu oyenzwe ngeSonto koBulawayo eliwuqhuba ekuqaleni komnyaka, owe annual general meeting, lapho abalandeli abathole khona indaba ezimnandi ezithi imizamo yenkonkeli yaleliqembu eyokuqeda isikwelede esibhekane leqembu leli kukhanya iyaphumelela.
Kubikwa iqembu le Highlanders lenelise ukuba lehlise lesisikwelede ngenkulungwane ezingamatshumi amathathu.
Lokhu kuza ngemva kokuba okhethwe ukuba ngumgcinisihlalo weqembu le Bosso nyakenye uKenneth Mhlophe efunge wagomela ngemva kokungena kwakhe esikhundleni wathi uzalwisa kanzima ukuqeda lesisikwelede ebesesihahabela ukuyafika kusigidi samadola.
Oke wasebenzela iqembu le Highlanders kanye lenhlanganiso ye Zimbabwe Football Association u Brian Moyo utshayele ihlombe iqembu le Highlanders ngokwenelisa kwalo ukuphungula isikwelede lesi kanye lendlela umhlangano wanamhlanje oqhutshwe ngawo.
Namhlanje njalo kuphiwe ithuba labo abakhankasela ukuba yingxenye yenkokheli yeqembu le Highlanders abagoqela uModern Ngwenya kanye lo Longwe Ndlovu bona abazancintisana bebanga isikhundla sikamsekeli kamgcinisihlalo weqembu kanye labathi u Donald Ndebele kanye lo Charles Ndlovu bona abancintisana bebanga ukuba ngumphathi ngcebo.
UNgwenya lo Ndebele bavele yibo abakade besezikhundleni njalo ukhetho lokudinga ukuba ngobani abazangena lonyaka luzaqhutshwa ngeviki ezayo mhla zintathu kunyanga ka Nhlolanja.
