Umongameli Emmerson Mnangagwa uzaqala imihlangano yakhe yokubonga uzulu ngokumvotela ngeviki ezayo.
UMnangangwa uzakuba ese Murehwa Centre eMashonaland East ngoMgqibelo.
Umgcinisihlalo wesigaba lesi, uMnu. Joel Biggie Matiza utshele umsakazo weZBC ukuthi lumhlangano uzakuba lithuba lokutshengisa usekelo lwebandla leZanu PF loMongameli Mnangagwa.
Sixoxe lesiphathamandla sebandla leZanu PF, uMnu. Believe Gaule ukuze sizwe imbono yakhe ngaloludaba.
“Ngemva kwalokhu okwenzakeleyo elizweni ngibona ingani kuqakathekeli khonalokho ukuthi ayebachazela ukuthi kuyini sibili afuna akwenze njalo kuyini okumele kwenzakala ukulungisisa umumo lo,” kutsho uGaule.
Uthi abantu basuka bacabangele ukuthi kucithwa imali yelizwe kodwa kungasiqiniso ngoba kusetshenziswa imali yebandla.
Lokhu sikudaba lunye, abaphikisana lombuso kaMongameli Emmerson Mnangagwa bathi imihlangano le yikucitha imali lesikhathi sikazulu. Sixoxe lengcwethi ecubungula ezombusazwe, uMnu. Thandeko Zinti Mkandla oyisiphathamandla sebandla leMDC.
“Ama rally okwenzani abantu belamba? Ama rally okwenzani bona abantu bengelanto yokwenza, bekhonona betshengisela belambile?” kutsho uMkandla.