Umkhokheli webandla leMDC, uMnu. Nelson Chamisa walisiwe njalo ngamasotsha ukungena emzini kamuyi, uOliver Mtukudzi umhlabeleli obengcwatsha namahla emzini wakhe koMadziwa duzane ledolobho le Buhera esigabeni seMashonaland Central.
UChamisa uze wangena ngemva kokuba abalandeli bakhe befuqe baze bawisa amasango.
Iziphathamandla zika hulumende, ezebutho kanye lezamapholisa, abamabandla aphikisayo kwezombusazwe, abaculi kanye labanye abatshiyeneyo baze ngobunengi bezovalelisa, uMtukudzi ophiwe inhlonipho yeqhawe lesizwe.
Obemelele umongameli welizwe umphathintambo wogatsha lwebutho lokuvikela ilizwe, unkosikazi Oppah Muchinguri wethule umbuko kamongameli ekhokhela ezinye iziphathamandla zika hulumende ezinjengomphathintambo wezokulima lomumo womkhathi uPerrence shiri, ICT uKazembe Kazembe, kuthi , umphathintambo wembiko lokusakaza uMonica Mutsvangwa lomkakhe uChris Mutsvangwa, uMayor weHarare uGomba kanye lamalunga edale lephalamende atshiyeneyo.
“Sibuthane lapha ukuthi sizobeka lokuthakazelela indodana yeZimbabwe, eyaveza ubungcitshi bayo kwezemculo. UDr Oliver Mtukudzi wabhubha mhla ka 23 Zibandlela 2019 ngemva kokugula ngomkhuhlane we diabetes. Namhlanje sibeka indodana yomhlabathini, wayethanda ilizwe lakhe, kwabanye wayengubaba, ukhulu, umalume, udadewabo, njalo wayesazakala ngokuthi Tuku,” kutsho uMuchinguri.
Kube yisiphithiphithi umkhokheli webandla eliphikisayo ele MDC uNelson Chamisa efika emzini obekukhalelwa khona umuyi ngemva kokuba ekewaliswa ukungena njalo wama phandla okwemizuzu engafika amatshumi amabili wasezangena.
Ngemva kokungena kwakhe, u Chamisa walelwe ukuthi ayehlala endaweni ebe ihlezi abahloniphekayo kodwa usuke wayazimela exukwini lezakhamizi kade zibuthene elangeni.
Izolo uChamisa walelwe njalo ukungena enkundleni ye National Sports Stadium lapho kade kulesikhumbuzo sikaMtukudzi.
Ilunga lebandla leli elilunga ledale lephalamende emele iHwange Central uMnu. Fortune Molokele usole okwenziwe ngamasotsha esithi kulusizi ukuthi ibandla le Zanu Pf lifuna ukuthatha imfa yeqhawe uMtukudzi kube ngumkhosi webandla labo.
“Ubaba uMtukudzi ubengumuntu okade ethanda abantu, ngiyakwazi lapho akhona uzwa ubuhlungu nxa ebona ukuhlukunyezwa okwenziwa inkokheli yethu ubaba uNelson Chamisa labaphathi bebendla le MDC ngoba iZANU PF izama ngamandla ayo ukuthi ikwenze kube yinto yeZanu Pf. UOliver Mtukudzi ubengu baba wesizwe sonke , lokhu kuzwisa ubuhlungu, kuyayangisa,” kutsho uMolekele.
UMolokele uqhubeke ethi kulusizi ukuthi imbali etshiywe ngumuyi eyokumanyanisa uzulu yephulwa emfeni yakhe amathambo abo engaka boli.
Uthe uMtukudzi wayeliqhawe elalilwela amalungelo olungu ngomculo okweminyaka eminengi okubangele ukuthi ibizo lakhe laziwe phose umhlaba wonke jikelele.
“Ngilapha ngiseMadziva village lami ngizephelekezela iqhawe lamaqhawe uOliver Mtukudzi ositshiye kuviki yonale, sikhule silalela ingoma zakhe sisuka nguma grade 1, saze saba ngabantu abadala. Ngumuntu osebenze kakhuly, so sithe lathi sizo mphelekezela simnike inhlonipho efanele yena,” kutsho uMolokele.
Abaphatheke kwezokucula bathi balahlekelwe yinkanyiso kwezokucula bekhomba ukuzithoba kanye lokusebenza gadalala okwenziwa nguMtukudzi.
Omunye wabahlabeleli okhulume le Studio 7 , uSani Makhalima, uthe uMtukudzi kufanele atshayelwe ihlombe ngokuba ngowakuqala ukuthi aphiwe leyo nhlonipho enkulu yesizwe kubahlabeleli njalo ube yisikhuthazo kubo.
“Into enzakale lapha singathi vele its long over due, kuhle ukuthi ilizwe liya phambili nxa sibona lihlonipha abaculayo. So nxa silapha sibona izenzo ezinje siyathaba kakhulu, siyathaba siyathaba,” kutsho uMakhalima.
Bekubuthene abangane kanye labanengi abasebenza loTuku kuminyaka edlula amatshumi amathathu ecula abafana lowakwele South Africa uSteve Dyer, unkosikazi Jesses Mungoshi owasebenza loMtukudzi kumdlalo kamabonakude owaba lodumo esaziwa ngokuthi Neria, labanye abanengi.
