Umongameli weleMelika uMnu. Donald Trump wethule umbiko wesimo sesizwe, iState of The Union izolo ngesikhathi seMelika, namuhla ngesikhathi seZimbabwe ekhuthaza ukubambana kwabezombusazwe.
Lumbiko uza ngemva kokuvalwa kwengatsha zikahulumende ngenxa yokungavumelani kukaTrump lamalunga ebandla eliphikisayo elama Democrats ngodaba lokuthi uluhlu lwendleko zikahulumende ezomnyaka ozayo lumele lube lemali yokwakha umduli wokuvala umngcele lelizwe leMelika leleMexico.
Umongameli Trump uqale umbiko wakhe ngokukhuthaza ukubambana lokusebenzelana kwamabandla ezombusazwe esithi ukubambana yiyo insika yesizwe seMelika.
Uphe njengomzekeliso ukubambana kwamabandla ekwethulweni umthetho okhangelana lokubotshwa lokuthoniswa owasekelwa ngobunengi bamalunga amabandla womabili.
Kesizwe amazwi kaMongameli Trump:
“Izigidi zabantu zisibukele zithembe ukuthi asisoze sisebenze njengamabandla ahlukeneyo kodwa njengesizwe esisodwa. Imbiko engizayethula ayitshengisi mbono yebandla lama Republicans kumbe eyema Democrats kodwa itshengisa eyembono yesizwe seMelika. Kodwa okuqakatheke kakhulu yikuthi sisungule imisebenzi yokulungisa izinto ezinkulungwane ezingamakhulu ayisithupha,” kutsho uTrump.
UTrump ulandise ngomnotho welizwe leMelika esithi akula esinye isikhathi kumbali yelizwe leMelika lapho okwaba lenani labokuza ababalisa abensundu eliphansi kakhulu encoma umbuso wakhe. Ke sizwe okunengi ngalokhu:
“Kuminyaka emibili esanda kwedlula sibumbe umnotho ongakaze ubonakale. Sisungule imisebenzi eyizigidi ezinhlanu,” kutsho uTrump.
Ukuhlaziya loludaba sixoxe lesizalwane seZimbabwe esesihlala ngapha kweleMelika, uMnu. Den Moyo.
UMoyo uthi imbiko kaMongameli Trump iqale ingeyokwakha kodwa kwathi sekulapha waqala ukucothoza abakubandla lama Democrats.
Kutsho uMoyo: "Okokuqala ngibona ingani ubezama ukuthi abambanise amabandla ama Republicans lama Democrats kodwa ngasikhathi sinye afake umbono wakhe ngezinto abangavumelani lazo okusuke kwenza kungani uyaxabanisa amabandla womabili."