Amapholisa ngoLwesihlanu abophe amalunga eMDC awedale lephalamende amabili abalisa uMnu Settement Chikwinya omela Imbizo kanye loMnu Lloyd Mukapiko omela iRedcliff.
Ababili laba bake babotshwa njalo ngoZibandlela besetheswa icala lokubangela udlakela kodwa babuya bakhululwa baxwayiswa yinkantolo ukuthi bazinikele kabili emapholiseni ngeviki.
Ngokunjalo, iMDC ithi uMnu Chikwinya loMukapiko babotshwe ngesikhathi besemapholiseni. Akukazakali ukuthi betheswa cala bani.
Ukubotshwa kwababili laba kuza ngesikhathi amanye amalunga ebandla leMDC ecatshile ngoba edingwa ngamapholisa.
Kuza njalo ngesikhathi inhlanganiso ezilwela amalungelo oluntu ezibalisa eyeAmnesty International, iHuman Rights Watch kanye leOxfam International sezilobele uMongameli Emmerson Mnangagwa incwadi zimkhuthaza ukuthi amise ukuhlukuluzwa kwabantu ngamasotsha lamabutho.
Inhlanganiso lezi zithi njalo bonke abaphatheka ekubulaweni, ekutshayeni lekudlwenguleni abesifazana kumele bajeziswe.
Sixoxe lesikhulumeli sikaMnu Nelson Chamisa, uDr Nkululeko Sibanda yena ochothoze uhulumende ngokuqhubeka ehlukuluza amalunga eMDC.
