Kambe imbiko yenhlanganiso zamatitshala ezimbili ezithi sezivumelane ukuthi amatitshala akade ekhalale umsebenzi asezabuyela emsebenzini kungakhathalekile lokuthi izikhalazo zawo zifeziwe ingabe itshengisani?
Inhlanganiso eye Zimta leye PTUZ zethule lumbiko zisithi zilethemba lokuthi uhulumende kasoze ajezise kade betshengisela laba kusukela ngeviki edluleyo.
Abanye amatitshala bathi inhlangaiso zabo zithengisile ngoba bekumele baqinise amakhanda njengokwenziwa ngabodokotela kumaviki ambalwa asanda kwedlula.
Umkhokheli we Zimta, uMnu. Richard Gundane uthi bathethe inyathelo lokuphindela emsebenzini kulandela ukukhangela into ezimbalwa.
“Nxa sikhalale umsebenzi laphana, abanye bayabe bengazi ukuthi sikhuluma iqiniso,” kutsho uGundane.
Omunye umzali, uMnu. Raymond Phiri uthi amatitshala bekumele aqhubeke ngokutshengisela ngoba izikhalazo zabo ziyazwisiseka nguzulu kunye lohulumende.
“Kuyikuthi vele ama union akhona vele abengabambananga kusukela ekuqaleni,” kutsho uPhiri.
Ingcwethi kwezemfundo, uMnu. Thandeko Zinti Mkandla uthi kuyamangalisa ukuthi amatitshala engabuyela emsebenzini izikhalazo zabo zingafezwanga.
“Kuyaxaka kancinyane vele okuyinto kwakhon ukuthi vele abantu bezimesele besithi ababuyeli emsebenzini kuze kulungiswe khonalokho okuxakayo,” kutsho uMkandla.
Kodwa uGundane uthi besebesethuselwa njalo babone kungcono ukubuyela emsebenzini ngoba besebesethuselwa.
“Ukuyethuselwa vele bekukhona. Sikhulume ngayo indaba yakhona so yikho okwenze sacina sitshiya ukutshengisela,” kutsho uMkandla.
Ukutshengisela kwamatitshala bekungatholanga sekelo olukhulu kusukela ekuqaleni ngoba amanye amatitshala aqhubeke esiyea emsebenzini lanxa bekuvunyelwane ukuthi kungayiwa emebenzini.
