Ukusilela kwamafutha ezimota elizweni kuqhubekela phambili ngesikhathi uzulu ewathenga ngobunengi esesabela ukuthi izulu lesiphepho, uCyclone Idai, lingaba litshaye impompi eziwaletha elizweni ezivela kwele Mozambique lapho lelizulu elitshiye umonakalo omkhulu.
Kodwa uhulumende uthi izulu alizange liphazamise impompi lezi.
Lanxa abatshayeli besithi bayaswela amafutha ezimota emagalajini njalo lendwendwe zemota zilokhu zisiya zikhula, umphathintambo wezamandla, uMnu. Joram Gumbo uthi ilizwe lilamafutha ayeneleyo.
Isakhamuzi sako Bulawayo, uMnu. Raymond Phiri, ohlala elokitshini le Sizinda uthi amafutha ezimota abeleve esilela okokuthi uhulumende usezathola umunwe wokucatsha ngawo.
Ukhansila wedolobho le Harare, uMnu. Thamsanqa Hadebe uthi izulu lesiphepho leli lizakwenza kubenzima ukuthola amafutha ezimota elizweni.
UHadebe uthi ukusilela kwamafutha la kuzabangela ukukhwela kwentengo yempahla ezitolo lokuwa kwesisindo semali yohlobo lwe bond ngoba abathengisa igwayi behlaselwe lizulu leli.
Kodwa umkhokheli umgcinisihlalo wenhlanganiso ye Motor Trader’s Association, uMnu. Abednico Bhebhe uthi amafutha azasilela kodwa kodwa kawasoze abangele ukukhwela kwentengo yempahla ngoba intengo yawo ingakhuphukanga.
Intengo yamafutha yakhwezwa ngenyanga kaZibandlela lapho okwaqhamuka khona ukutshengisela okwatshiya abantu abedlula itshuma lanhlanu befile.
