Ukhetho lokudinga ukhansila ka ward 28 eCowdray Park ko Bulawayo luzaqutshwa kulokuphithizela okungakaze kubonakale kusibanga samakhansila.
Ngokwakuqala ukuthi umsekeli kamongameli abonakale ekhankasa kulesi sigaba esazakala singeseMDC.
Ibandla leMDC lona liya kukhetho lolu lilamalunga amabili azancintisa elimele, okungadala udubo olungabangela ukuthi kungqobe omela ibandla le Zanu PF.
Amalunga la nguAlderman Collet Ndlovu, owayengukhansila weCowdray Park okweminyaka elitshumi, kodwa ngokhetho olwedluleyo wanqotshwa kuma primary elections ngukhansila Happison Ncube.
Kodwa ngokuswelakala kwenhlanhla, uNcube ubhubhe kunyanga ezimbalwa ezedluleyo, okubangele ukuthi kuqhutshwe lolukhetho.
Omunye ozancintisa emele iMDC nguNkosazana Nomagugu Mloyi, othi kaphumi emncintiswaneni ngoba kwakulokuqilibezela kulolokhetho njalo ibandla lakhe lathi kaqhubeke encintisa.
UMnu. Kidwell Mujuru uncintisa emele ibandla leZANU PF. Alitshumi lambili amabandla aphatheka kulokukhetho.
UAlderman Ndlovu utshele uSithandekile Mhlanga weStudio 7 ukuthi kaphumi kulokukhetho ngoba nguye owangqoba kukhetho lwama primaries.
Omunye wakhe uNkosazana Nomagugu Mloyi uthi nguye okufanele ancintise kulolukhetho ngoba ibandla lisithi nguye omele alimele.
Lithiye indlebe kuwonalo umsakazo kusasa ngasikhathi sinye, lapho esizaxoxa loMnu. Nkosi Nyoni, oncintisa kukhetho olufanayo emele iMthwakazi Republic Party,ochasisa ngokuthi kungani ibandla lakhe kuyilo elingaletha umehluko edolobheni lakoBulawayo.