Amalunga ekhomithi yedale lephalamende eyeStanding Rules and Orders Committee, athi asefike esigabeni seManicaland leMasvingo, njalo azaqalisa ukuhlolisisa namuhla umonakalo owenziwe lizulu lesiphepho uCyclone Idai kulindawo, ukwenzela ukuthi azibonele okwenzakalayo, ngendlela yokudingisisa amacebo okulungisa loludaba.
Lokhu kwenzakala ngesikhathi kulembiko ethi ibandla leZanu PF seligogodlele impahla ekhitshwa ngabantu ukuthi iphathise abehlelwa yingozi yezulu leli.
Amalunga la, aziqoqe abangamaqula amabili njalo elinye liseMasvingo, elinye eChimanimani.
Omunye okuqula leMasvingo, uNkosazana Thabitha Khumalo, ongumkhokheli webandla leMDC edale lephalamende uchasisela uSithandekile Mhlanga weStudio 7 abazakwenza kusukela namuhla kusiya ngoLwesihlanu.
