Ibandla leMDC-T lithi liphatheke kabi ngomfanekiso osenkundleni zokuxhumana oveza isikhulumeli salo uNkosazana Linda Masarira ezithandele ngelembu leZanu PF elilomfanekiso kaMongameli Emmerson Mnangagwa.
Ibandla leli lithi labasekeli balo bakhathazekile kakhulu.
Ngokunjalo, lithi selithume umkhokheli walo uNkosazana Thokozani Khupe ukuthi ahlale phansi loMasarira ngoLwesine azwe ukuthi kuyini okwenze wavunula impahla yebandla leZanu PF yena engoweMDC-T.
Lanxa singenelisanga ukukhulumisana loMasarira, ingcazelo ayiphe embikweni awethulele uzulu ngeyokuthi wenza lokhu ngoba wayekwabozala njalo engelalo elinye ilembu ayengathandela ngalo.
Umgcinisihlalo weMDC-T uMnu Abednico Bhebhe utshele iStudio 7 ukuthi bazathathela uMasarira amanyathelo nxa bethe bamupha ithuba lokutsho icele lakhe.
Abanye abakhulume lalumsakazo abangathandanga ukuziveza bathe uNkosikazi Masarira ulakho ukucelwa ukuthi azisukele esikhundleni sakhe. Bathi engala ulakho ukuxotshwa.