Ele Rwanda linanza ilanga lombhuqazwe owenzakala kulelolizwe ngesikhathi ele Zimbabwe lilokhu lingacaci ukuthi owalo umbhuqazwe, owaphiwa igama lokuthi Gukurahundi uzakhunjulwa njani.
Sokuleminyaka engamatshumi amabili lathoba munwe munye kwenzakala lumbhuqazwe we Rwanda lapho abesihlobo sesi Hutu ababulala osowabo besi Tutsi abafika phose isigidi esisodwa, one million.
Lumbhuqazwe waphela ngemva kokuthatha umbuso okwenziwa ngumongameli Paul Kagame ngomnyaka ka 1994.
Kusukela ngalowomnyaka ilizwe le Rwanda selithuthuke ukwedlula amazwe wonke awezwekazi le Africa.
Lelilanga lizanazwa emhlabeni jikelele lase Zimbabwe okuzakuba lombuthano eHarare.
Unobhala jikelele wenhlanganiso elwela ilungelo likazulu wesigaba seMandebeleni, eye Ibhetshu Likazulu, uMnu. Mbuso Fuzwayo, utshele uChris Gande weStudio Seven ukuthi kunengi okungafundwa ngele Zimbabwe lalo elaba lombhuqazwe olokhu uzila ukukhulunywa ngawo.