Umphathintambo obona ngezemali, uMnu. Mthuli Ncube ungapha kweleMelika lapho akhulumisana lenhlanganiso eziphathisa amazwe ngamali, I IMF le World Bank.
Ilizwe leZimbabwe alitholi ncedo kuhlanganiso lezi ngenxa yezizatho ezimbalwa ezigoqela ukungasebenzisi kahle inotho yelizwe kodwa uNcube uthi imizamo yakhe yokuxoxisana lalezinhlanganiso emihlanganweni eyenziwa kanye ngomnyaka ziyathembisa.
Kunjalo nje, uNcube uthi uhulumende usezasungula imali entsha kusiyaphela umnyaka owodwa.
UNcube utshele intathelizindaba zomsakazo we Bloomberg News ukuthi isivuno segwayi esalonyaka sikhangelelwe ukuletha inzuzo edlula ibhiliyoni elilodwa okuzaphathisa ekuqiniseni isisindo semali le entsha.
Ele Zimbabwe lokhu lingela mali yalo engasetshenziswa laphandle kwelizwe kusukela ngomnyaka ka 2009.
Ingcwethi ehlaziya ezomnotho welizwe, uMnu. Bekithemba Mhlanga utshele uChris Gande we Studio Seven ukuthi imali entsha ilakho ukuphathisa umnotho welizwe.
Isisindo semali yohlobo lwe bond leye RTGS dollar sihlala sesingesiwileyo lanxa uhulumende wayesithi sizahlala sehlukene ngamadola amabili lamasenti angamatshumi amahlanu.
Omunye wabathengisa imali, osiphatheleni, osebenza ezitaladeni zako Bulawayo ongafunanga ukuqanjwa ngegama utshele iStudio Seven ukuthi akuthembisi ukuthi imali entsha izaphathisa umnotho welizwe.