Inkokheli yamabandla ancintisa kukhetho lokudinga umongameli olwedluleyo ihlangene namhla eHarare kungela mkhokheli webandla elibusayo, ele Zanu PF, uMongameli Emmerson Mnangagwa.
UMnangagwa ukwele Botswana lapho angena khona umhlangano ohlaziya ngokulondolozwa kwendlovu zeganga.
Umhlangano wanamahlanje, oyenzelwe esigodlweni sikamongameli, iState House eHarare, ubikwa uhlaziye imininingwane yomhlahlandlela wenkulumo zamabandla la eyethulwa ngamakhomidi amane abunjwa kumaviki amathathu adluleyo.
Kodwa umkhokheli webandla leMDC, uMnu. Nelson Chamisa, ongekaze angene kulezinkulumo, ubengekho.
UNkosazana Thokozani Khupe, okhokhela ibandla leMDC-T laye ubengekho ngoba kuthiwa uyekwelatshwa esibhedlela se South Africa.
Sixoxe lesiphathamandla sebandla lakhe, uMnu. Abednicho Bhebhe ukuze sizwe okunengi ngalezi nkulumo.