Umutsho othi “ukubona okwabonwa yingidi” ubuzwa kuzakhamizi zedolobho lakoBulawayo kulezinsuku zona ezithi ngapha zithwele amagabha avuzayo ngokusilela kwamanzi zibuye njalo zibhekane lokuvalelwa amagetsi nsukuzonke.
Amanye amalokitshi agoqela eleSinzinda leleTshabalala aselamalanga amathathu engela ngitsho lethonsi elilodwa lamanzi aphuma empompini.
Umanisipala wakoBulawayo uqale ukuvalela izakhamizi amanzi okwamalanga amathathu elandelelana ngeviki, kumaviki edluleyo emizameni yokuwalondoloza ngoba esesilela kakhulu emadamu alelidolobho.
Kwamanye amalokitshi amanzi ahambe ngoLwesibili njalo abikwa ezaze aphenduke ngoLwesine kumbe ngoLwesihlanu.
Uzulu uthi lokhu kumfaka engozini yokuhlaselwa yimikhuhlane ehambelana lengcekeza efana lesihudo seCholera.
Kodwa umanisipala uthi akulalutho angalwenza ngoba amadamu esesitsha. Isakhamuzi seSizinda uMnu Raymond Phiri utshele iStudio 7 ukuthi sebephila impilo engela sithunzi.
Ngakolunye uhlangothi, udubo lokucitshwa kwamagetsi oluqale ngeviki edluleyo elizweni lonke lalo luyaqhubeka.
NgoLwesibili amagetsi atshone engekho endaweni ezinengi zelizwe, ezigoqela koBulawayo.
Isikhulumeli senhlanganiso emela izakhamizi zakoBulawayo, eyeBulawayo Progressive Residents Association, uMnu Ambrose Sibindi, ithi uzulu sethwele nzima ngodaba lwamagetsi lolu.
Umphathintambo kahulumende obona ngezamandla amagetsi uMnu. Jorum Gumbo, utshele iStudio 7 ukuthi uhulumende uthole imali eyizigidi ezingamatshumi amahlanu amadola -50 million dollars eyama lines of credits abeselungele ukusebenza eyokuthenga amafutha ezimota njalo sikhuluma nje, abelwa amagalaji.
Uthe ukusilela kwamagetsi kubangelwa yikuthi amanzi asemalutshwana edamu leKariba njalo amahlahle eHwange Power Station awathokali lula.
Uqhubeke wathi uhulumende uzathenga amagetsi eMozambique ukwengezelela lawo akhona elizweni.
Umongameli Mnangagwa uthi kufanele abantu bebekezele ngoba ulenhlelo ezimqoka zokuvuselela umnotho welizwe njalo kungathatha isikhathi.
Ukuhlaziya loludaba, sixoxe lengcwethi ezehlukeneyo, ezigoqela inkokheli yamabandla ezombusazwe kanye labacubungula umnotho welizwe.