Umkhokheli weMDC uMnu Nelson Chamisa ngoMgqibelo ukhuthaze abasekeli bebandla lakhe ukuthi bamukele abantu abangaboni ngaso linye labo njalo batshiyane lomkhuba wenzondano.
Ekhuluma emhlanganweni webandla lakhe wokukhetha inkokheli entsha, oweCongress oqhutshelwa eGweru, uMnu Chamisa uthe kuqakathekile ukuthi amalunga ebandla lakhe asebenze lomuntu wonke jikelele ekwakheli ilizwe leZimbabwe.
Uchothoze uMongameli Emmerson Mnangagwa esithi uyehluleka ukubuza kuhle avuselele umnotho welizwe.
Ngokunjalo, uthe kumele bahlale phansi bakhulumisana ukuze kulungisiswe ezombusazwe lezenotho eziqhubeka zitshabalala.
Umhlangano lo ungenwe zinkulungwane zabantu ezigoqela umkhokheli webandla eliphikisayo kweleUganda uMnu Bobi Wine lenduna yeNtabazinduna uChief Nhlanhlayamangwe Ndiweni.
Kusiyatshona ilanga, ibandla leli beselikhethe inkokheli yalo entsha yogatsha lwabasakhulayo kuphela.
UMnu Tererai Obey Sithole nguye osengumgcinisihlalo wogatsha lolu njalo unobhala jikelele walo nguMnu Gift Ostalos Siziba.
UMnu Siziba utshele iStudio 7 ukuthi lanxa ekujabulela ukukhethwa kwakhe, bayakunanzelela ukuthi umkhulu umsebenzi ababhekane lawo njengabasakhulayo.
