Umkhokheli wenhlanganiso emela ababalisi bemaphandleni eyeAmalgamated Rural Teachers Union of Zimbabwe (ARTUZ), uMnu Obert Masaraure uthunjiwe ngabantu ekade behlome ngemibhobho ebusuku izolo.
Umkakhe uSabrina Kundai Masaraure utshele iStudio 7 ukuthi bangenelwe ngamadoda ayisithupha endlini yabo eseWaterfalls eHarare ahudula umyeni wakhe amfaka emoteni ahamba laye.
UNkosikazi Masaraure uthe njalo amadoda la kazange aziveze ukuthi angobani lokuthi afunani kumkakhe. Wengeze wathi amanye awo ebezivale ubuso.
Isehlakalo lesi siza ngemva kokukhalala umsebenzi kwamalunga enhlanganiso kaMasaraure ekhala ngeholo eliphansi njalo esithi kumele uhulumende awahlawulwe ngedola laseMelika.
Ukukhalala umsebenzi lokhu kuqale ngoMvulo kwaphela izolo.
Ngesikhathi ekhuluma lalumsakazo, uNkosikazi Masaraure uthe ubengakayimangala emapholiseni ngoba bekuphakathi kobusuku, ngakho ubesesaba ukuhamba yedwa.
Asenelisanga ukukhuluma lamapholisa ngaloludaba. Inengi lithi isehlakalo lesi siyethusa ngoba kulabanye abanengi abathunjwayo banyamalala kokuphela abafana loMnu Itai Dzamara.
Kusenjalo, enye njalo inhlanganiso yababalisi eyeZIMTA, ithi uhulumende kumele engezelele ababalisi iholo ngenkulungwane ezintathu zemali yamaRTGS njalo enye ibe ngeyedola leMelika.
Isiphathamandla seZIMTA uMnu Sifiso Ndlovu uthi ababalisi bathwele nzima ngoba imali abayiholayo ayibenelisi lutho.
