Ukubotshwa kwabasebenzela inhlanganiso ezizimeleyo abayisikhombisa ababotshwe kunsukwana ezisanda kwedlula besetheswa icala lokumuna ukugenqula uhulumende lomkhokheli wenhlanganiso yamatitshala eye Amalgamated Rural Teachers’ Association, uMnu. Obert Masaraure sokubangele ukuthi abantu bathi uhulumende useqalile njalo umkhuba wakhe.
Abayisikhombisa abavalelwe ejele le Chikurubhi betheswa icala lokwenza umhlangano elizweni le Maldives owawubahlomisa ngokugenqula uhulumende kusetshenziswa indlela ezitshiyeneyo ezingela zikhali.
Ababotshiweyo babalisa u George Makoni owe Centre for Community Development Trust; Nyasha Frank Mpahlo oweTransparency International Zimbabwe; uTatenda Mombeyarara owe Citizens Manifesto; uGamuchirai Mukura owe Community Tolerance Reconciliation owe Development Trust. Ngelanga elilandelayo kwabotshwa u Farirai Gumbonzvanda, olwela ilungelo lamantombazana esebenzela inhlanganiso ye Rozaria Memorial Trust.
Ukuhlaziya loludaba sixoxe lolwela ilungelo likazulu esigabeni seMatabeleland, uMnu. Mbuso Fuzwayo endawonye lomfundisi Anglistone Sibanda onguye osungula lingxoxo.
