Namhla kuhlelo lwethu esixoxa ngokungafundiswa kwembali yebandla le Zapu levuyo le Zipra sixoxa lowalwa impi, uMnu. Strike Mkandla, ongunobhala jikelele webandla le Zapu.
UMkandla uthi okwabangela ukuthi kubanjaniswe ibandla le Zapu le Zanu ngomnyaka ka 1987 kwakuyikuthi kucitshwe igama le Zapu ngokuthi amabandla amabili athiwe yi Zanu PF.
"Lokhu kutshengisela ukuthi babevele befuna ukuthi bacitshe igama le Zapu njalo okwesibili njengabo basebehlanganisile amabandla la basebenzisa amandla abo kuhulumende ukuthi zonke izinto ezikhulunywayo kuthiwe zenziwe nguhulumende we Zanu," kutsho uMkandla.
Uthi lokhu kwahle kwacitsha konke okwenziwa yi Zapu.
Uthi isivumelwano somanyano ese Unity Accord senza ukuthi uhulumende akhokhelwa yiZanu PF ngoba baze bakuloba lakusivumelwano lesi ukuthi umkhokheli uzakuba nguMgabe, owabethwa ngegama lakusivumelwano lesi.
"Yi agreement eyabhalwa kubi ngoba iyahle itsho ukuthi okhokhelwa amabandla omabili kuzakuba nguMugabe. Ubhalwe ngebizo. UNkomo kabhalwanga ngebizo ku Unity Accord okutshengisa ukuthi babefuna ukucitsha ukuthi kuyini okwenziwa yi Zapu," kutsho uMkandla.
Uthi kusuka lapho babaleqiniso ukuthi uzakhokhela ibutho le Zimbabwe National Army kuzakuba ngu Rex Nhongo yena owabuya emva kakhulu kulo Dabengwa.
