Izisebenzi zikahulumende kanye lezengatsha ezithile ezizimeleyo zithi zizakhalala umsebenzi kuqala ngoMvulo zikhonona ngokuthi iholo lazo kalisenelisi ukuziphilisa ngoba intengo ezitolo iqhubeka ikhwela mahlayana nje.
Ngokunjalo, zithi abaqhatshi kumele bazengezelele iholo njalo bazihlawule ngedola lakweleMelika.
Izisebenzi ezithi zizakhalala umsebenzi kanye lezithi zizahamba kuphela nxa zithe zathola imali yokugada zigoqela ezempilakahle lababalisi bezikolo ndawonye labamanyuvesi afana leLupane State University, iMidlands State University leUniversity of Zimbabwe.
Izisebenzi zamabhanga atshiyeneyo lazo sezithethe inyathelo elifanayo.
Kuke kwaba lokukhalala umsebenzi okufanayo ngoZibandlela lapho okwaqhamuka khona udlakela amasotsha lamapholisa acina esebulala abantu abafika amatshumi amabili.
Ukukhalala umsebenzi kwakhathesi kuza ngesikhathi umnotho uqhubeka ubhidlika ngendlela esabekayo kanti njalo loMongameli Emmerson Mnangagwa esithi uhulumende uzakwethula imali entsha phakathi kwenyanya eziyisitshiyagalolunye ezilandelayo.
Unobhala jikelele wenhlanganiso yezisebenzi eyeZCTU uMnu Japhet Moyo utshele iStudio 7 ukuthi ukukhalala umsebenzi okuzayo lokhu akumangalisi ngoba izisebenzi sezithelwe nzima.
