Isisindo sedola leMelika sesehle kakhulu okokuthi abantu abanengi sebesiya emabhanga ukuyathenga kumbe ukuthengisa imali osekubangele ukuthi banye abathengisa imali ezitaladeni, osiphatheleni sebetshiye umsebenzi ngenxa yalokhu.
Uhulumende uthi lokhu kuyisibonelo sokuthi umnotho usuvuselelwa. Kodwa ezitolo intengo iqhubeka iqansa.
NgoMvulo amapholisa abikwa ebebopha abathengisa imali emgwaqweni.
Sixoxe lomunye wabathengisa imali emgwaqweni ko Bulawayo, usiphatheleni, ongafunanga ukuqanjwa ngegama.
Esinye isakhamuzi sako Bulawayo eSizinda, uMnu. Raymond Phiri uthi ukwehla kwesisido sedola akutshengisi lakancinyane ukuthi umnotho ususiba nganeno kodwa kukhanya lokhu kuzakuba lodubo olwedlula olukhona kathesi.
Esinye njalo isakhamuzi sako Bulawayo, uNkosazana Rita Ndlovu uthi okwenzkalayo akukhanyi kahle ngaba usuku ngalunye luthwele olulakho.
Umphathintambo wezemali, uMnu. Mthuli Ncube utshele ikhomdi yedale lephalamende ukuthi umthetho asanda kuwethula ophathelane lokusetshenziswa kwemali yakwamanye amazwe usebenza kahle njalo usuqalisile ukuvusela umnotho.
