Abalwela amalungelo abantu abaphila legciwane lengculazi (HIV) batshengisele eHarare ngoLwesine bekhonona ngokuthi baphiwa amaphilisi asedlulelwe yisikhathi (expired) ezibhedlela zikahulumende.
Bathi lokhu kumele kulungisiswe ngokuphuthuma ngoba kufaka impilakahle yabo engozini enkulu. Bebekhonona njalo ngokusilela kwemithi ezibhedlela.
Abantu laba babuthene egcekeni leAfrica Unity Square bethwele amabhakane alembiko etshyeneyo egoqela obusithi “Asifuni mithi e-expayileyo” lothi “Make Access to Quality Treatment a Priority.”
“Okungilethe lapha yindaba yama-expired medicines. Abantwana sebephiwa imithi esi-expayile kuma-health facilities. Esikutshoyo yikuthi abantwana sebelimala,” kutsho uNkosazana Patience Dube, owenhlanganiso emela abantwana abaphila leHIV eyeHope Alive Child Network.
Abatshengiseleyo laba bebevela kunhlanganiso ezitshiyeneyo ezigoqela eyeZenzeleni People Living with HIV etholakala esigabeni seMatobo District lakoBulawayo leyeZimbabwe Country Coordinating Mechanism yona esebenza iphansi kweGlobal Fund.
Umqondisi wohlangothi olubona ngokuphathelane lomkhuhlane wofuba kugatsha Iwezempilakahle uDr. Owen Mugurungi utshele iStudio 7 ukuthi umuntu wonke weZimbabwe ulelungelo lokutshengisela njengabantu laba.
