Udubo lokuvalwa kwamanzi ko Bulawayo solufike kusibanga esethusayo kulandela ukoma kwezinye izikotsho lobudlwangudlwangu osobusenziwa kuzikotsho ezisebenzayo.
Umanisipala wako Bulawayo uthi kukhona okulungiswayo okubangele ukuthi avalwe kusukela ngolwesibili aze avulwe ngoMvulo kodwa izikotsho zalelidolobho ezagejelwa ukuncedisa izakhamizi sezandelwe okokuthi sezisoma.
Kwamanye ama ward kubikwa ontanga sebebhadalisa ukukha amanzi esikotsho.
Sixoxe lomgcinisihlalo wenhlanganiso yezakhamizi eye Bulawayo Progressive Residents’ Association, uMnu. Ambrose Dibindi ukuze sizwe okunengi ngaloludaba.
"Kodwa eqinisweni yikuthi umumo wamanzi usumubi. Abantu bebengathi bayabekezela kodwa esikunanzelelayo yikuthi kwezinye indawo akula ma borehole. Lapho akhona asekhulelwa, asewoma," kutsho uSibindi.
