Ezinye izizalwane zeZimbabwe ezihlala eBhilitani ezaphatheka kuhlelo lokutshengisela edolobheni leLondon ngeviki edluleyo lapho okwaphosa kwatshaywa khona umphathintambo obona ngobudlelwano beZimbabwe lamanye amazwe, uMnu Sibusiso Moyo zithi izihlobo zazo ekhaya sezisethuselwa ngabasekeli beZanu PF njalo sezihlalela evalweni.
UMoyo, yena owayehamba lezinye iziphathamandla ezigoqela umabhalane wogatsha olubona ngokwethulwa kwemibiko, uMnu Nick Mangagwana, bahlaselwa ngababetshengisela laba babathela ngamanzi njalo kwaba lokutshayana.
Ukutshengisela lokhu kwakuqoqwe zinhlanganiso ezitshiyeneyo zibambene lebandla leMDC.
Isiphathamandla senye yalezinhlanganiso, iRestoration of Human Rights Zimbabwe, uMnu Panyika Karimanzira uchasisele uChris Gande weStudio 7 okunengi ngaloludaba.