Umbukiso womsebenzi wezokwemba walonyaka oyenziwa kanye ngomnyaka, othiwa Mine Entra, Mining and Engineering and Transport Expo 2019, uphele ngoLwesihlanu koBulawayo, abembi abakulumsebenzi becala ugatsha lukahulumende lwezokwemba ngokuba basebenze masinya ekubapheni amalicence.
Evula umhlangano walamuhla wezokwemba, uMphathintambo wogatsha lwezokwemba, uMnu Polite Kambamura uthembise abembi ukuba bapheka umthetho ozahlonipha abembi abancane ngoba yibo abaletha igolide eledlula amatshumi ayisithupha ekhulwini kuhulumende njalo umthetho okhona waqala ukusebenza ngomnyaka ka1961 uloncindezelo kubembi abancane.
Abakumsebenzi wezokwemba laba bathi njalo lomthetho obunjwayo wezokwemba ungabilukhuni ukuze basebenze kuhle.
Umqondisi weZimbabwe International Trade Fair, uMnu. Nicholas Ndebele uncome umbukiso lo.
“Umbikiso uhambe kuhle kakhulu siyathokoza ngenani labantu ababukisayo abazileyo lobanje bekulobunzima bokuletha impahla yokubukisa lokuhlala kwabantu, abantu babuyile ngobunengi njalo bakhanya bethabile kakhulu ngebhizimusi abalitholileyo lobanje bekulethuba lokuthi kudlule lapha kodwa siyabonga ngosekelo esiluthole kubantu abaze ukuzobukisa lonyaka,” kutsho uNdebele.
Osakhulayo okubhizimusi lokwemba uNicole Hove uchaza abakukhangeleleyo kumthetho obunjwayo wezokwemba.
“Sikhangelele izinto ezineni sesifuna ukubona lokho okuyabe kubhalwe phansi kusenza, uhlelo lwecadstra system lokulwela kwendawo kuphange kuphele. Sikhangelele kakhulu ukuthi uhulumende aqhubeke lemithetho esekela abembi njalo ayethule umthetho owomileyo wokusebenza kwemali yakwamanye amazwe kanye lokuthi emawofisini kubelomthetho oqeda ubuqili,” kutsho uHove.
UMnu. Nicholas Dube okubhizimusi lokwemba uthi ukhangelele umthetho oqotho ozaqeda ingxabangxoza ekuleli bhizimusi.
“Sikhangelele umthetho oqinileyo uhulumende azakwenelisa ukuwulandela njalo lokunqabela ezombusazwe kwezokwemba. Kulokungahlonitshwa okuthize kwendawo zabanye zokwemba kanye lokungenela kwamapholisa labanye abantu okungekho emthethweni sikhangelele umthetho ozaqeda lokhu noba okwamanje akusebenzeki siyathathelwa mahlayana indawo zethu zokusebenza kungabindabazalutho,” kutsho uDube.
UMnu. Philimon Mukwili okubhizimusi lokwemba osuka eGwanda uthi bakhangelele ukuba imicijo yabo ibekhona kumthetho omutsha wezokwemba.
“Umthetho lo kumele basibuze thina njengabembi ngoba thina siyakhupha imibono yethu kodwa sekuohele ukulotshwa sekulomthetho kuyabe sekungasekho, singananzelela kuviki edlule bekulomhlangano obona nalo uthetho olotshwayo eVictoria falls kodwa thina bekungela muntu osimeleyo. Kumele sibelesandla esikhulu ekulotshweni kwalo umthetho noba yithi esithengiselauhulumende iolide elinengi ukudlula amankampani amakhulu,” uMukwili.
UMqondisi wogatsha olubona ngezemvelo, iEnviromental Management Authority , uNkozikazi Chipo Mpofu-Zuze uchaza imithetho abayikhangeleleyo kumthetho wezokwemba omutsha ukuze kubelobudlelwano obuhle kubembi lezakhamizi.
“Esikukhangeleleyo kakhulu njengogatsha lwezemvelo kumele kubelobudlelwano kubo bonke abasebenzisa umhlabathi, ebesijwayele ukukubona yikunazwani lokudonselana phakathi kwabalimi labembi njalo lokhu kuphazamisa inhlelo esizenzayo. Sikhangelele lokuthi labasakhulayo kwezokwemba bahlonitshwe ngumthetho omutsha njalo babelethuba lokuphatha kuhle lapho abemba khona baphathe kuhle imvelo njalo bahloniphe lemithetho yemvelo,” kutsho uMpofu-Zuze.
Isikhulumeli seZimbabwe Miners Federation, uMnu. Dosman Mangisi uthi minengi imithetho abayikhangelele ukuba iguqulwe ikakhulu umthetho wamawola.
“Umthetho lo kumele ukhangele imithetho eminengi ezakwenza ukuba abembi abancane bahlonitshwe, leminye imithetho yokuzivikela engozini lakumawola unanzelele abembi abancane ukuze okusebenza lempumela yomsebenzi ithuthuke,” kutsho uMangisi.
Inengi labantu abakubhizimusi lokwemba likhala ngokuncindezelwa ekuqaleni amabhizumusi lekuthengiseni amatshe aligugu ngemva kokwemba.
Umbukiso walonyaka ubugijima ngendikimba ekhuluma ngokukhangela elakusasa kwezokwemba, gesilungu ethi ''Resourcing the Future: Exploring and Leveraging Mining Potential.”
