Umsekeli kamongameli welizwe, uMnu. Constantino Chiwenga ubikwa esiwe esibhedlela seChina esuswa kwese South Africa namhla.
Isikhulumeli sikamongameli, uMnu. George Charamba wethule umbiko othi uChiwenga, ogula umkhuhlane ongavezwanga, uzakwenziwa ama test kwele China.
Ngeviki edluleyo uMongameli Mnangagwa wathi uChiwenga usengcono njalo usesenelisa ukuzivoca umzimba. UChiwenga ubikwa eye kwele China ekhatshwe ngabodokotela abavela emazweni athi India, China, South Africa le Zimbabwe.
“Ihofisi kamongameli izaqhubeka isazisa uzulu ngesimo sikaChiwenga,” kutsho uCharamba.
Lokhu kwenzakala ngesikhathi umphathintambo wezemithetho, uMnu. Ziyambi Ziyambi esiwe esibhedlela se Trauma Centre eHarare ngemva kokuba iBP yakhe ibikwa iqanse okwedlula amalawulo.
Umsekeli kamphathintambo wezemibiko, uMnu. Energy Mutodi utshele iStudio Seven ukuthi okwenziwe yihofisi kaMongameli kuyancomeka ngoba kuzenza intathelizindaba zibikele uzulu indaba eziliqiniso hatshi ukufanisela.
UMgcinisihlalo webandla leMDC, uNkosazana Thabitha Khumalo utshle iStudio Seven ukuthi bafuna uChiwenga ayekwelatshwa ezibhedlela zekhaya.
