amalinks wokungena

Breaking News

Abathenga Impahla Phandle Bakhala Ngokulahlekelwa Yinzuzo Ngenxa Yokumiswa Kwemali Yakwamanye Amazwe


Abathenga impahla ngaphandle kwelizwe, ikakhulu kweleBotswana beyithengisa eZimbabwe bathi ukumiswa kokusetshenziswa kwemali yakwamanye amazwe, okugoqela idola leMelika sekudale ukwehla kwenzuzo kubhizimusi labo.

Uhulumende umiswe ukusetshenziswa kwezimali lezi ngenyanga edluleyo wethula umthetho othi sokusebenza idola leZimbabwe kuphela elizweni.

UMnu Rodwell Ndlovu, yena othenga izigqoko esiyazithengisa emkambo weFlea Market koBulawayo, utshele iStudio 7 ukuthi okunzima kubo kakhulu yikuthi bona kweleBotswana bathenga ngamaPula, kodwa uma befika ekhaya kumele bathengise ngedola leZimbabwe.

"Kuqala kade sisenelisa ukuthi sifike sithengise ngamaPula, iRand kumbe idola leMelika, kodwa khathesi ungathengisa ngemali yaphandle ulakho ukubotshwa. Ungathengisa ngeBond, sekusitsho ukuthi kumele siqale ukuyintshintsha njalo ibe yimali esingathenga ngayo phandle kwelizwe," kutsho uMnu Ndlovu.

UNkosazana Sihle Sibanda othengisa impahla yendlini efana lamagedlela kagetsi lezitofu, uthi ukuswelakala kwedola leZimbabwe emabhanga kanye lemkambo wensitha lokwehla kwesisindo salo nxa liqathaniswa ledola leMelika, kutsho ukuthi kubanzima ukuthi bathole imali yakwamanye amazwe.

"Ungakhangela, ngesikhathi kungeniswa imali yeZimbabwe, ibithenga amadola amabili alengxenye kudola lakweleMelika, kodwa khathesi isikhwele okwamagama. Ukungahlaliseki lokhu kubanzima kithi esiyabe sifuna ukuthenga ngemali yakwamanye amazwe," UMaSibanda uchasisele iStudio 7.

Inani eliphezulu, ngenxa yokuswelakala kwemisebenzi ekhaya, liphila ngokungena emazweni afana leBotswana kanye leSouth Africa ukuyathenga impahla yokuthengisa.

Ngaphandle kwemali, abanye abafana loMnu Rodrick Dube, bathi inhlanganiso ebona ngokuhlawulwa kwemithelo eyeZimbabwe Revenue Authority (ZIMRA) iyathatha okumele kube yinzunzo, behlawula ngemali yakwamanye kwezinye impahla.

Kutsho uDube: "Kulezinye imphahla othola ukuthi umthelo wazo uhlawulwa ngemali yakwamanye amazwe emngceleni. Lokhu kudala ukugugudeka kwenzunzo yethu, ngakho uhulumende, ngesimo esikuso, ngabe uyehlisa umthelo we duty, njalo lawo, uhlawulwe ngemali yeZimbabwe."

Uzulu ukhala ngokuthi uhulumende kaMongameli Emmerson Mnangagwa uyehluleka ukumisa ukutshabalala komnotho osokudale ukukhuphuka kwentengo yamafutha ezimota lezinto zonke njalo nje.

please wait

No media source currently available

0:00 0:02:45 0:00

XS
SM
MD
LG