Ukukhwela kwentengo yamafutha ezimota sokubangele ukukhuphuka kwentengo yempahla ezitolo abanye abezitolo ezithengisela ezinye, ama wholesalers, sebesithi kabadiliveli impahla ngenxa yokuqonga kwamafutha la.
Intengo yamafutha ezimota ingezelelwe izolo ilitha elilodwa lisuka kumadola ayisithupha, $6.10 layafika kumadola adlula kancane ayisikhombisa $7.47.
Lokhu kukhwela ngokwesihlanu kusukela ekuqaleni komnyaka.
Inengi selisithi lokhu kutshengisa ukuthi uhulumende usehlulekile kodwa abanye abafana loMnu. Believe Gaule owebandla leZanu PF, uthi kumele uzulu aphe uhulumende ithuba lokuvuselela umnotho welizwe.
Isakhamuzi sakoBulawyo, uMnu. Edwin Ndlovu, oyisiphathamandla njalo sebandla leMDC uthi intengo isihle yakhuphuka kusukela kukhwezwa intengo yamafutha ezimota.
Ingcwethi ecubungula ezomnotho, uMnu. Masimba Kuchera uthi ukukhwezwa kwentengo yamafutha sokuzabangela ukuthi isilinganiso sokugugudeka komnotho, iinflation, siqonge.
Ezinye ingcwethi zithi ukuphiwa imali yokuphathisa amapholisa lamasotsha, icushion allowance okwenzwe ngeviki edluleyo yikho okubangele ukukhwela kwamafutha ezimota.
