amalinks wokungena

Breaking News

Imidlalo Yenguqu yePSL Idluliselwa Phambili Ngoba Abadlali Abanengi Base Mauritius


Iqembu leHighlanders Football Club

Kulemidlalo yenguqu emithathu edluliselwe phambili kusigaba se Castle Lager Premier Soccer League kulimpelaviki njengoba kulamaqembu alabadlali abanengi abahambe leqembu lesizwe kwele Mauritius.

Imidlalo edluliselwe phambili ngebalisa umdlalo obekumele ubephakathi kweqembu le Highlanders lele Bulawayo Chiefs, umdlalo obekumele ubephakathi kweqembu le Chicken Inn lele Herentals kanye lomdlalo obekumele ubephakathi kweqembu le Triangle lele Yadah.

Iqembu le Highlanders lilabadlali abane kuqembu lama Warriors elizadlala lele Mauritius kuhlandla lakuqala elesigaba sakuqala esomncintiswano we African Nations Championship kumbe iChan ngamafitshane.

Amaqembu athi ele Chicken Inn kanye lele Yadah wona alabadlali abathathu kuqembu lesizwe.

Emidlalweni ezadlalwa kusasa kuviki yetshumi lesithupha iqembu le Chapungu lizadlala lele Manica Diamonds ngase Mandava, iqembu le Black Rhinos lizadlala lele FC Platinum ngase National Sports Stadium kuthi iqembu le Dynamos lizadibana lele Harare City ngase Rufaro.

NgeSonto iqembu le Mushowani Stars lizadlala lele ZPC Kariba ngase Trojan Mine, iqembu le CAPS United lizangqikilana lele Ngezi Platinum Stars ngase National Sports Stadium kuthi iqembu le Hwange lizemukela ele TelOne ngase Colliery.

Emdlaweni webhola lokuqaga umphathithambo wezemidlalo uKirsty Coventry usethembise iqembu ebelimele ilizwe emidlalweni yezizwe zomhlaba ukuba ngemva kwamaviki amabili lizathola imivuzo evela kuhulumende njengesibongo esokuba lidlale kuhle kumncintiswano wokudinga intshantshu zomhlaba jikelele.

“Lisenze sazigqaja ngokuba yizizalwane zase Zimbabwe ngokuyamela ilizwe ngendlela ebukekayo. Ngithanda ukulazisa ukuba njengohulumende siphezu kokulilungisela isibongo elingasithola ngemva kwamaviki amabili kuyindlela yokulibonga ngokusebenza gadalala elikwenzileyo,” kutsho uCoventry.

Iqembu le Zimbabwe liphutshe lisendaweni yethoba minwe mbili phakathi kwamaqembu alitshumi lesithupha angene kumncintiswano oqhutshwe ensukwini ezisanda kwedlula owe Vitality Netball World Cup.

Bekungokwakuqala ukuba iqembu elimela ilizwe le Zimbabwe liphatheke kulelizinga lemidlalo eyebhola lokuqaga njalo abanengi abalandela ezemidlalo bebekhangelele ukuba lizakuba ngumthatshuzwa njengoba belilungiselele ngendlela engacacanga.

Emdlalweni kakhilikithi amaqembu athi ele Badgers kanye lele Tigers yiwo azakuba ngabaqali besiziba kusasa ekuqaleni kwemidlalo yalonyaka eye Spar Bonsa T20 Cricket League.

Lumdlalo ukhangelelwe ukuqala sekugamenxe ihola lesikhombisa ekuseni njalo uzalandelwa ngozakuba phakathi kweqembu le Hawks lona elizadibana lele Sabres ikanti umdlalo wesithathu uzakuba phakathi kwe Blazers kanye le Raptors.

NgeSonto umdlalo wakuqala uzakuba phakathi kweqembu le Sabres kanye lele Blazers kuthi owesibili uzadlalwa phakathi kwe Tigers kanye le Hawks kuthi owesithathu uzakuba phakathi kweqembu le Raptors kanye lele Badgers.

Yonke limidlalo iqhutshelwa endaweni ye Old Mutual Heath Streak Multi Sport Academy.

please wait

No media source currently available

0:00 0:02:50 0:00

Facebook Forum

XS
SM
MD
LG