Namhla sisungula inhlelo zeviki yonke lapho esiyabe sixoxa ngodaba lwendlala enkulu ehlasele ilizwe, sigxila emaphandleni.
Siqala ngesigaba seMatabeleland North lapho esixoxa khona lesakhamuzi se Dete, uMnu. Stanley Torima ongukhansila njalo.
UTorima uthi indlala lonyaka imbi kakhulu.
"Indlala inkulu kakhulu lonyaka. Abadala sebekhala sebelenyanga ezikwana four months bengawutholi umumbu lowu owama sociala welfare. Kuthi labana abangakafinyeleli iminyaka yokuthi baphathiswe yi social welfare intengo ezitolo sezikhuphukile," kutsho uTorima.
Uthi impuphu eyisisindo se 10 kgs isiyi $30. UTorima uthi kusukela emangweni wakhe owe Dete kuqansa kusiyafika eHwange, eJambezi kulendlala embi kakhulu.
Uthi emasimini abatholanga okuzwayo, bathole umumbu nje owokosa nje kuphela.
Kodwa uthi amadlelo enkomo alokhu ekhona okokuthi inkomo zingafikisa ngenyanga ka Lwezi zisidla.
