Uhulumende uthi useqinisa imizamo yokulwisana lenkohlakalo elizweni, kulandela ukubotshwa kukamphathintambo wakhe uNkosikazi Prisca Mupfumira, owetheswa icala lokusebenzisa imali kahulumende efika phose izigidi ezilukhulu, $95 million.
Umthethwandaba ukhangelelwe ukunquma namuhla ukuthi uNkosikazi Mupfumira uzaphiwa na ithuba lokuhlawula imali yesibambiso sebail kumbe ahlale esitokisini kusaphenywa icala aletheswayo. Uhulumende usebenzise umthetho ingcwethi kwezomthetho ezithi awusasebenzi ovumela amapholisa ukuthi avalele umuntu ocatshangelwa ukuthi udale icala elikhulu kakhulu okwamalanga angamaviki amathathu.
Lokhu kwenzakala abasakhulayo abakubandla leZANU PF besithi basaqoqa olunye njalo uluhlu lwamabizo eziphathamandla zikahulumende ezilenkohlakalo, oluzaphiwa ikhomishini ebona ngaloludaba eyeZimbabwe Anti-Corruption Commission.
Ngenyanga edluleyo abasakhulayo laba bamangalise abanengi bezebethule uluhlu lwamagama abantu abathi kumele bacutshungulwe ukuthi abasebenzisanga inkohlakalo ukuthola inotho yabo.
Lolu luhlu lwalulamgamga enkokheli yebandla leZanu PF egoqela uMpofu, uMupfumira, usibalukhulu webhanga lesizwe, ele Reserve, uMnu. John Mangudya labanye.
Ngempela Sonto kuke kwaba lehungahunga lokuthi umphathintambo wezezisebenzi, uNkosikazi Sekai Nzeza usebalekile elizweni esesaba ukubotshwa ngenxa yamacala enkohlakalo.
Kodwa uNzeza ulandule lokhu wathi yena ubeyezivakatshela nje ekhaya njalo umsulwa.
Kwathi ngoMvulo kwazwakala njalo elinye ihungahunga lisithi owayengumphathintambo wezemigodi, uMnu. Obert Mpofu laye usebotshelwe amacala enkohlakalo kodwa kwathi ngokuya kwesikhathi kwatholakala ukuthi ngamanga.
Ukuhlaziya loludaba, uSithandekile Mhlanga weStudio 7 uxoxe lengcwethi ecubungul aezombusazwe uMnu. Rejoice Ngwenya, aqale ngokumbuza ukuthi kambe ngempela uhulumende engabe esezimisele ukulwisana laloluhlupho ngokupheleleyo.
