Ixuku lakuqala labancintisa ukumela ibandla lama Democrats kukhetho lweMelika lomnyaka ozayo olokudinga umongameli libe lengxoxo mpikiswana izolo ebusuku edolobheni le Detroit eMichigan.
Namuhla kulelinye njalo ixuku labancintisayo elibalisa okhokhela kungalane yabancintisayo kucwaningo olwenziwa nsuku zonke, uMnu. Joe Biden loNkosikazi Camara Harris abazamisana njalo kungxoxo mpikiswano namuhla.
Ixuku labalitshumi laba belibuzwa imibuzo zintathelizindaba zenhlanganiso ye CNN ezintathu, uJack Tapper, Don Lemon lo Dana Bash, baphikisane ngendaba ezimbalwa ezibalisa uhlelo lokwelatshwa, ihealth care, ubandlululo ngemihlobo lokunye.
ICNN yiyo eqoqe ingxoxompikiswano le.
Abakade bephikisana laba bebesola okunengi okukhulunywa nguMongameli Trump osengohlala echothoze inkokheli yabensundu.
UMnu. Bernie Sanders usole uhlelo lwe health care olukhona esithi lunothisa abathengisa imithi kodwa uzulu yena ethwelenzima.
Unkosizaki Elizabeth Waren yena uthe udaba lwe health insurance kumele luqakathekiswe libandla lama Democrats ngoba ibandla lama Republicans lifuna ukususa loluhlelo.
Kudaba lokudutshulwa kwabantu uNkosikazi Amy Jean Klobuchar uthe kumele inhlanganiso ekhuthaza ukuhloma ngemibhobho eye NRA ingavunyelwa usiko lwayo.
UMnu. Berto Orouke uthe kuzamele ilizwe leMelika livuselele ubudlelwano lamanye amazwe ngoba lilembali yokusebenzelana lamanye amazwe hatshi okukhona kathesi.
Inani labadinga ukumela ibandla lama Democrats kukhetho lomnyaka ozayo likhulu ukwedlula eminye iminyaka yonke. Kodwa kukhangelelwe ukuthi lizancipha ngemva kwengxoxomikaswano lezi kuze kusale ababili labo abazaphikisana kuze kusale oyedwa.
Ukuhlaziya loludaba sixoxe lesizalwane seZimbabwe esihlala ngapha kweleMelika, uMnu. Raphael Mthombeni.
