Abalandeli bomdlalo webhola lokuqaga bathi umdlalo lo ulakho ukuthuthuka eZimbabwe kulandela ukuphatheka kweqembu elimela ilizwe, elamaGems, kumncintiswano weNetball World Cup.
Iqembu leli liphakamise igama leZimbabwe ngendlela elidlale ngayo kulumncintiswano kweleBhilithani kumaviki asanda kwedlula.
AmaGems aphutshe esendaweni yethobaminwemibili phakathi kwamaqembu alitshumi lasithupha.
Oleqembu lakhe elidlala kusigaba seMasiye Netball League uCindy Mulelo uthi sebethole abadlali abatsha ngemva kwemidlalo yeNetball World Cup.
“Ngemva kokuba amaGems evele eLiverpool sibone abantwana abafuna ukudlala umdlalo webhola lokuqaga bebuya ngobunengi njalo kumidlalo yethu esiyidlalele eNketa bekungasimuntu obelapho,” kutsho uMulelo.
“Asazi mhlawumbe bebefuna ukubona omunye wabadlali beqembu lamaGems laye odlalela elinye lamaqembu adlala kuMasiye Sports League kodwa okusalayo yikuthi indlela abantwana ababuye ngayo ngobunengi babo ibijabulisa kakhulu.”
Intathelizindaba yezemidlalo uNash Mkokwayarira uthi inkokheli zomdlalo webhola lokuqaga kuzamele zisebenzise udumo olulethwe liqembu lamaGems ukuba bekhulise lumdlalo.
“Into eyenziwe liqembu lamaGems yinto enhle kakhulu njalo kumele abantu beqhubeke besekela lumdlalo.
“Sikhangelele ukuba bonke abasukumela phezulu bephathisa leliqembu baqhubekele phambili besekela imiamo eyokukhulisa lumdlalo ikakhulu kwabasakhulayo ezikolo ukuze njengelizwe siqhubekele phambili sidlala umdlalo wezinga laphezulu,” uqhubeke echasisa uMkokwayarira.
Umphathintambo wezemidlalo uKirsty Coventry utshele iqembu lamaGems ukuthi uhulumende uzazama ngamandla wonke ukuba asekele ngemali langezinye indlela ukuze amaqembu angathwali nzima nxa elungiselela ukuyamela ilizwe emncintiswaneni eyehlukeneyo.
“Kusiya phambili kuzamele sithuthukise indlela esikhulumisana ngayo njengenhlanganiso ezibona ngokuqhutshwa kwezemidlalo ukuze amalungiselelo amaqembu amela ilizwe ehambe kuhle. Ngaleyo ndlela singenza ukuba ezemidlalo zithuthuke yonke into ihambe ngendlela,” kutsho uCoventry.
Iqembu lamaGems lithwale nzima ngokuswela imali ngesikhathi lilungiselela imidlalo yeWorld Cup laze lathola usekelo sekulokwesabela ukuba lingehluleka ukuya kulimidlalo.
