Namhla kuhlelo lwethu lapho esihlaziya khona umumo wendlala yalonyaka kulandela ukungani kahle kwezulu sixoxa loMnu. Thandeko Zinti Mkandla isakhamuzi se Gwanda njalo ephatheke kwezombusazwe.
UMkandla uthi umumo wendlala usubuye waba mubi ngamandla ngoba lasemadolobheni lakho akula kudla.
"Bekuyindlala kusaseluhlazana mhlawumbe lamathonsi amanzi esasekhona ezizibeni. Kathesi akulalutho, sokomile, utshani butshile inkomo sizwa kuthiwa sezisiwa kwezinye indawo," kutsho uMkandla.
Uthi kubi kakhulu kuzifuyo kodwa lasebantwini lakho kuyafana ngoba abantu sebecuba engqondweni zabo njengezifuyo zabo.
Uthi ukususwa kokusetshenziswa kwemali yakwamanye amazwe kwenza kubenzima ngoba laleyo eyafakwayo ukuthi isetshenziswe kayitholakali lula lanxa ungayithola impahla yakhona ezitolo zikwela mihla lamalanga.
UMKandla uthi ngenxa yesimo somnotho inengi kalifuni kuthengisa izifuyo ngoba kuyabe kufana lokuzilahla.
"Kunzima abantu sebephongukuthembela ukuthi kuzasala khonko okusilayo okokuthi balutshwana abathengisayo abantu basbekezela nje kancinyane," kutsho uMkandla.
