Ibandla leZANU PF lithi liqhubekela phambili ngohlelo lokuthi umphakathi aziphekele isinkwa esebenzisa uhlobo lwembiza zama oven ezibunjwe ngodaka njalo zibaselwa ngomlilo njengalokho okwakusenziwa endulo.
Ama wovoni la asegcwele ilizwe lonke. Umphathintambo kahulumende uNkosikazi Sithembiso Nyoni ukhangelelwe ukwethula loluhlelo eHwange leVictoria Falls kuyonale impelaviki.
Uhlelo lolu soluchothozwe ngabanengi, abathi alusoze luphathise abantu njengoba okuswelakalayo kuyingqoloyi, njalo lubuyisela ilizwe emuva ngesikhathi kulendlela eziphucukileyo zokupheka isinkwa hatshi ezendulo.
Umgcinisihlalo webandla leZANU PF eMatabeleland North uMnu. Nkosilathi Jiyane utshele uSithandekile Mhlanga weStudio 7 ukuthi sebeqoqe amaxuku abesifazana abazaqhuba lumsebenzi sebefundiswe nguNkosikazi Nyoni.
“Lingananzelela ilizwe nxa liphakathi kobunzima njangalobu esiphakathi kwabo, siphakathi kwama sanctions singatholi isupport kwamanye amazwe, yebo kambe kulama engagements ukuthi umongameli uyazama ukukhuluma lamanye amazwe sokuyimizamo yokuthi lathi sizenzele,” kutsho uJiyane.
