Impilo kazulu weZimbabwe, yena ovele esidla imbuya ngoluthi, ikhangelelwe ukuba lukhuni ngamandla kulandela ukukhwezwa kwembadalo yamandla kagetsi, intuba zomgwaqo ama-tollgates lokunye okutshiyeneyo.
Umphathintambo obona ngezemali uMnu Mthuli Ncube wazise ngokukhuphuka kwembadalo le ekwethuleni kwakhe uluhlu lwendleko kahulumende, iSupplementary Budget izolo.
Amagetsi akhwele ngesilinganiso sokungamakhulu aphezu kwamabili njalo intuba zomgwaqo zona zikhwele nge500 percent.
UNcube ukhuphule njalo umthelo wamafutha ezimota, okutsho ukuthi intengo yawo layo ikhangelelwe ukukhwela.
Imbadalo yokubhalisa imota entsha yona ikhuphuke ngokungamakhulu amane, i400 percent.
UNtungamili Nkomo weStudio 7 uxoxe lengcwethi ecubungula ezenotho uMnu Masimba Kuchera ukuze sizwe imbino yakhe ngaloludaba.
“Ngibona angani ibudget leyi isilethe ubunzima obukhulu ebantwini ngoba kulento ezinengi esezikhwelile kodwa abantu balokhu bengela mali yokuthi bakuthenge,” kutsho uKuchera.
Uthi ukukhwezwa kwembadalo yamagetsi lama toll gates akulunganga ngoba intengo yamagetsi ifana leyamafutha epetulo ngoba into ezisebenzi amandla la lazo zizakhwela.
