Inhlanganiso elwela ilungelo labokuza kwele South Africa eye Africa Diaspora Forum ithi izakusa uhulumende wele South Africa lamapholisa kulandela ukubotshwa kwabokuza abedlula amakhulu azinkulungwane eziyisikhombisa besetheswa icala lokungabi lamaphepha okuhlala okusemthethweni ngoLwesithathu eJohannesburg.
Kulabangamakhulu amabili abakhululiweyo ngoLwesihlanu, abangamatshumi amabili bengabe Zimbabwe.
Ukufuthelana phwakathi kwamapholisa labokuza kubikwa sokulesikhathi kwaqala amapholisa esetheswa umlandu wokuhlukuluza abokuza laba bethathelwa impahla abazithengisayo.
Kodwa ngeviki edluleyo abokuza laba babikwa bethe hatshi sebediniwe sokuyisikhathi sokuphindisela bajikijela amapholisa ngamatshe aza abaleka ngesikhathi efuna ukubopha abanye babo.
Kuthe ngeviki yonale amapholisa aze ngobunengi agqagqela idolobho ahamba edobha abantu ngamunye ngamunye labakade besezindlini zabo kungakhathalekile ukuthi umuntu ulamaphepha kumbe hatshi.
Sixoxe lomgcinisihlalo wenhlanganiso ye African Diaspora Forum, uMnu. Vusumuzi Sibanda.
