Ibandal leMDC lithi amalungiselelo okutshengisela kweviki ezayo ngoLwesihlanu akusibanga esikude kungakhathalekile ukuthi amapholisa athini. Amapholisa athi asahlaziyo isaziso semdc andubana abazise ukuthi bazavunyezwa na ukutshengisela lokhu okukhangelelwe ukwenziwa edolobheni le Harare.
Kodwa ibandla leMDC lithi phansi kwesisekelo sombuso welizwe uzulu uyavunyelwa ukutshengisela ngalokho bazakuya emthethwandaba nxa bengavunyelwanga ukutshengisela.
Sixoxe lesikhulumeli sebandla leli, uMnu. Daniel Molokele ukuze sizwe okunengi ngaloludaba.
“Ye ngithanda ukuthi ngitshele abalaleli ukuthi njengebandla leMDC silazo inhlelo ezihambelana le policy document yethu okuthiwa yi RELOAD. Nxa ubjeke iRELOAD silenhlelo ezinhlanu olwakuqala yilonalolu oluthi singezelele imizamo yokufaka amandla okuthi kukhulunyiswane,” kutsho uMolokele.
UMolokele uthi ukutshengisela lokhu kuzenziwa eHarare kodwa kuyingxenye yohlelo oluzaqala eHarare lapho abayabe betshengisela ngendlela yokungaphathwa kahle umnotho welizwe lokunye.
“Kutsho ukuthi sizahlala phansi sivumelane ngezinye indlela zokuqhubekela phambili ngomkhankaso wethu kuzagoqela lokuthi amanye amadolobho eZimbabwe lawo akhankasele ukutshengisela,” kutsho uMolokele.
