Kuthunjwe umgcinisihlalo weMDC eMufakose uMnu Blessing Kanotunga kanye lolwela amalungelo oluntu engowenhlanganiso yeCitizens Manifesto uMnu Tatenda Mombeyarara ngoLwesibili ngabesilisa ekade behlomile, bababhaxabula kabuhlungu balimala kakubi.
Isehlakalo lesi sichothozwe kakhulu ngabantu abanengi abagoqela amagqwetha enhlanganiso yeZimbabwe Lawyers for Human Rights laweZimbabwe Human Rights NGO Forum.
UKanotunga uthi abamthumbileyo laba bambuzisise ngohlelo lweMDC olokutshengisela ezitaladeni zeHarare ngoLwesihlanu.
Wengeze wathi abantu laba bamtshaye kakubi njalo utshengise intathelizindaba umzimba wakhe obumanxebanxeba.
“Nxa kukhona ebengikuphambanisile, bekumele bangise emapholiseni. Amazwi ekade bewakhuluma ngesikhathi bengitshaya ngawokuthi kuyini esikutshelwe nguChamisa, ‘utheni uChamisa, licabanga ukuthi lingakhipha umnangagwa embusweni?
“‘Manje sizabona, okwakho sokuphelile ngoba sifuna ukukubulala. Ngibaphendule ngathi mbulalani. Bangivale amehlo bangitshaya ngacina ngisila ngokwenza angani sengifeyintile. Yikho okungiphephisileyo,” kuchasise uMnu Kanotunga.
UTatenda Mombeyarara yena asenelisanga ukukhuluma laye, kodwa inhlanganiso yakhe yethule imifanekiso yakhe elaliswe esibhedlela laye emanxebanxeba.
Eloba enkundleni yeTwitter, isikhulumeli sikahulumende uMnu Nick Mangwana uthe kabalalwazi lokuthi ababili laba batshaywe ngobani.
Kodwa olwela amalungelo oluntu uMnu Charles Nyoni utshele iStudio 7 ukuthi akalakuthandabuza ukuthi le yimisebenzi kahulumende.
Isigodlo someli weMelika eZimbabwe laso sethule umbiko sichothoza ukuthunjwa lokuhlukuluzwa kukaMombeyarara loKanotunga sisithi ubudlova obunje abulasabelo elizweni elilombuso okhululekileyo.
Amazwi la agcizelelwe yingcwethi kwezombusazwe uMnu Dinizulu Macaphulana.
