Induna yeNtabazinduna uMnu Felix Nhlanhlayamangwe Ndiweni lezakhamizi zalesisigaba ezilitshumi lantathu bavalelwe esitokisini ngoLwesine ngemva kokufunyanwa belecala lokubhidliza impahla yesinye isakhamuzi.
Bazagwetshwa ngoLwesihlanu. Lanxa belilandule icala, umantshi wakoBulawayo uthe ubukakazi obethulwe ngabatshutshisi buveze sobala ukuthi ngempela balidala lelicala.
UNdiweni wazakala kakhulu ngokuchothoza umbuso weZanu PF njalo ungomunye wabantu ekade bekhuthaza uzulu ukuthi aphatheke kuhlelo lweMDC lokutshengisela eHarare lakwamanye amadolobho.
Kusenjalo, amapholisa abophe osakhulayo weMDC uNkosazana Cicilia Chimbiri phezu kohlelo lokutshengisela lolu kanye lolwela amalungelo oluntu uMnu Pride Mukono, oyisiphathamandla senhlanganiso yeCrisis in Zimbabwe Coalition.
UMukono wetheswa icala lokuqoqa ukugenqula uMongameli Emmerson Mnangagwa embusweni.
Ukubotshwa kukaMukono kukhuphule inani lasebebotshelwe icala lokuzama ukuvukela umbuso kaMnangagwa lafika kumatshumi amabili lambili.