Amapholisa abikwa ethembise ukuvimba ukutshengisela okuqoqwe libandla leMDC ko Bulawayo namuhla.
Amapholisa abikwa etshele intathelizindaba zephephandaba lobulembu, ele ZimLive.com ukuthi abavumeli ukutshengisela lokhu ngoba besesabela ukuthi kungaqhanuka udlakela.
Phambilini kwalumbiko umthethwandaba ubikwa ulahlele khatshana iscelo senhlanganiso ezine ezithi, iConfederation of Zimbabwe Retailers’ Association, iBulawayo United Residents’ Association (BURA), iApostolic Christian Council of Zimbabwe (ACCZ) leyabachola amabele eye Grain Millers’ Association of Zimbabwe sokuthi kungatshengiselwa ngoba kungonakala impahla lokuphazamisa ibhizimusi.
NgoLwesihlanu olunye njalo uhlelo olufanayo kade luqoqwe libandla leMDC lucithiwe ngamapholisa atshaya abantu kabuhlungu ngemva kokuba umthethwandaba uthe lelibandla lingatshengiseli kusesatshelwa udlakela.
Kodwa abalwela ilungelo likazulu bayalisola lelinyathelo besithi uzulu ulelungelo lokutshengisela ngokuthula phansi kwesisekelo sombuso welizwe.
Phambilini kokutshengisela kwakoBulawayo ampholisa abophe umgcinisihlalo webandla, uNkosazana Thabitha Khumalo, lezinye iziphathamandla zebandla ezinhlanu, ebezikhankasela ukuthi uzulu atshengisele ngobunengi.
Sikhuluma nje bavalelwe esitokisini njalo isimo sabo asaziwamuntu ngoba amapholisa esala ukuthi babonane lamagqwetha kumbe izihlobo labangane.
Sixoxe lesikhulumeli sebandla leMDC ko Bulawayo, uMnu. Swithun Chirowodza saqala ngokumbuza ukuthi bazaqhubeka ngokutshengisela na khona sokulembiko ethi amapholisa awasoze abavumele?
Kunjalo nje, sixoxe lowake wamela ibandla leZanu PF edale lephalamende, uMnu. Joseph Tshuma sambuza ukuthi ulubona njani udaba lokumiswa ukutshengisela osekwenziwe ngamapholisa?