Ibandla leMthwakazi Republic Party lithi amalunga alo amabili uMnu. Marshall Sibanda loMnu. Luckson Maphosa batshone ezandleni zamapholisa ngoLwesine, baze bakhululwa ntambama, bebuzisiswa ngokutshengisela kwabo mhla kugwetshwa induna uMnu. Felix Nhlanhlayamangwe Ndiweni ngeviki edluleyo.
Isikhulumeli salelibandla uMnu. Mbonisi Gumbo uthi uSibanda loMaphosa, abakade bekhatshwe ligqwetha labo uMnu. Dumisani Dube, babuzwe njalo ngokuthi abaphathekanga na ekutshayeni umsekeli kamayor wedolobho lakoBulawayo uMnu. Tinashe Kambarami ngenyanga edluleyo.
Amapholisa abikwa ethe sokufanele amalunga ebandla leli wonke aze kuwo ngoLwesihlanu, ezobuzisiswa ngaloludaba.
Ngakwelinye icele, amalunga ebandla leli afunyanwe engelacala kulandela ukubotshwa kwawo etshengisela eweteleni le Rainbow hotel kunyanga ezimbalwa ezedluleyo, esola ukuqhatshwa kwabantu abavela kwezinye indawo ezingasoMatabeleland kuleliwetela.
Abakhululiweyo babalisa u Marshall Sibanda, Nkosinathi Ncube, Luckson Maphosa, Rodney Ncube, Mthabisi Ncube, Mqondisi Sibanda, Thembinkosi Mpofu, Iphithule Malahleka, Killian Masuku, Nkomo, lo Sithembakuye Nyoni,
UMnu. Gumbo uchasisela uSithandekile Mhlanga weStudio 7 okunengi ngokubotshwa kwesikhatshana kukaMnu. Sibanda loMnu. Maphosa.
