Ukukhalala umsebenzi kwabodokotela kungene kulanga lesibili ngoLwesithathu njalo inhlanganiso yeZimbabwe Hospital Doctors Association (ZHDA) ithi odokotela abasebenza ezibhedlela zikahulumende kabayanga emsebenzini elizweni lonke jikelele.
Odokotela laba bakhala ngokuthi iholo labo kumele lengezwe ngezinga elihambelana lesisindo semali yeZimbabwe nxa iqathaniswa ledola leMelika emkambo wemali.
Umkhokheli weZHDA uMnu Peter Magombeyi uthi uhulumende kumele alungisise izikhalazo zabo ngokuphangisa babuyele emsebenzini ngoba izigulane sezithwele nzima.
Kodwa isiphathamandla sogatsha lukahulumende olubona ngokusebenza kwabezempilakahle olweHealth Servises Board uMnu Paulinas Sikhosana utshele iStudio 7 ukuthi ukukhalala umsebenzi lokhu akukho emthethweni.
“Okusalayo yikuthi ukungayi kwabo emsebenzini akukho emthethweni,” kutsho uMnu Sikhosana.
“Yebo siyawuzwisisa umumo abakuwo ngenxa yokubhidlika komnotho; imizamo esesiyenzile njengohulumende ngeyokuthi sikhulumisane labo sibone ukuthi singalungisisa njani udaba lwabo.”