Namhla kuhlandla lethu lapho esixoxa lezizalwane zeZimbabwe esezihlala phandle kwelizwe sixoxa loMnu. Benard Bhekilizwe Ndlovu, umlingisi owazakala kumdlalo othiwa Makorokoza njalo eyisikhwicamfundo.
UNdlovu usehlala kwele South Africa lapho afundisa khona ukuqeda udlakela kusetshenziswa imidlalo. UNdlovu uxoxe lo Chris Gande we Studio Seven emchasisela ngohambo lwakhe.
“Kwakukuhle eZimbabwe, kumnandi ukudlala imidlalo yama drama lobanje bekungasiphi lutho. Kwakulesikhathi esasibizwa khona ukuthi singama PP okutsho ukuthi popular but poor,” kutsho uNdlovu.
Uthi yena kwakungcono ngoba waysenza lumsebenzi ngapha evele esebenza emahofisini.
UNdlovu uthi wasuka ekhaya esiya eSouth Africa ngemva kokuphiwa umsebenzi wokuthi ayesebenzisa imidlalo ye drama ukulwisana lokumemetheka kwegcikwane le HIV.
Wahle waqala ukusebenza engena lasemajele efundisa izibotshwa indlela yokuthuthukisa impilo lasezikolo.
“Kulale character engangiyenza kumdlalo othiwa Makorokoza eyayilotshwa ngu Thoko Zulu iqondiswa ngu Cont Mhlanga yiyo engayenza kakhulu ngoba yacina ingisa kuma NAMA Awards,” kutsho uNdlovu.
Uthi okwenza umsebenzi wokulingisa ubemnandi yikuphiwa isikhundla sokudlala omunye umuntu ongelani lawe njengalokho akwenza ku Amakorokoza eyisigelekeqe.
